Leita í fréttum mbl.is

Bloggfærslur mánaðarins, mars 2008

Fínar tillögur

Það væri kannski vit í að hlusta núna á Framsókn. Þingmenn flokksins vöruðu við alvarlegum afleiðingum metaukningar á ríkisúthgjöldum við gerð síðustu fjárlaga. Það var vitaskuld óðs manns æði að auka útgjöldin um 20% þegar þessi efnahagsdýfa vofði yfir, og má segja að sú ráðstöfun ríkisstjórnarinnar hafi endanlega tryggt að dýfan skall á með miklu meiri krafti en hefði þurft að verða.

Allar götur síðan þá hefur Framsóknarflokkurinn svo kallað eftir því að ríkisstjórnin fari að gera eitthvað í efnahagsmálum, annað en að tala. ,,Ó, vakna þú mín Þyrnirós" söng Guðni ómþýðum rómi en Geir rumskaði ekki. Vonandi eru menn búnir að átta sig á því að menn geta ekki talað sig út úr erfiðleikum sem þessum. Aðgerðir þurfa að fylgja orðum.

Sérstaklega hljóta menn að vera búnir að átta sig á mikilvægi Íbúðalánasjóðs fyrir landsmenn alla og vonandi að honum verði beitt í ríkari mæli til að tryggja öllum almenningi hagstæð lán til húsnæðiskaupa og losa fólk undan ofurvaldi bankanna. Þessar tillögur um hlutverk sjóðsins í að létta byrðum af bönkum og almenningi hljóta að verða skoðaðar gaumgæfilega.


mbl.is Vilja fella niður neysluskatta
Tilkynna um óviðeigandi tengingu við frétt

Þarft innlegg hjá húsbóndanum

Það sést vel á þeim sem eru að blogga um þessa frétt að þeir vilja ekkert horfa á aðgerðir núverandi stjórnar en velta sér upp úr því sem þeir telja að hafi verið í tíð Framsóknar.

Í fyrsta lagi er því að svara að Framsóknarmenn sviku aldrei einhver gefin heit til handa öldruðum og öryrkjum. Við skiljum vel þann vanda sem við er að glíma að stýra þessum málaflokki og reyndum okkar besta til að bæta kjörin. Það eru hins vegar alltaf til þeir sem telja að gera megi betur og sjálfsagt var það í einhverjum tilfellum rétt.

Í öðru lagi þá getur ekkert verið að því að spyrja þá sem hæst göluðu í stjórnarandstöðunni á sínum tíma hvort þeir séu á sama máli í dag og þeir voru þá. Jóhanna hafði oft uppi stór orð í umræðu um málefni aldraðra og öryrkja. Hún er kannski aðeins að kynnast því á eigin skinni núna að það er ekki alltaf þægilegt að eiga við þennan hóp sem getur sannarlega verið erfiður viðureignar, og er ekki alltaf á þeim buxunum að láta ráðamenn njóta sannmælis þegar eitthvað er vel gert en liggja stöðugt í skotgröfunum.

Í þriðja lagi þá er ekki hægt að ætlast til þess að stjórnarandstöðuþingmaður þegi þunnu hljóði gagnvart ríkisstjórn sem er nú við völd, bara vegna þess að einu sinni var studdi hann aðra ríkisstjórn. Í þessu máli er Birkir svo langt frá því að vera ósamkvæmur sjálfum sér sem hugsast getur. Hann er aðeins að kalla eftir skýrum svörum um hvort að núverandi ríkisstjórn ætlar sér að standa við eigin loforð eða ekki! Það hlýtur að vera í verkahring stjórnarandstöðunnar.

Auk þess hefur Birkir ekki einu sinni gengið svo langt að saka heilaga Jóhönnu um að standa ekki við orð sín heldur vill aðeins að hún standi fyrir máli sínu. Þessi krampakenndu vandlætingarviðbrögð þegar þingmenn Framsóknarflokksins eru að reyna að vinna vinnuna sína finnst mér farin að vera leiðingjörn svo ekki sé meira sagt.


mbl.is Birkir Jón: Vill ræða málefni aldraðra og öryrkja
Tilkynna um óviðeigandi tengingu við frétt

Taka á þessu liði í hvelli

Þegar samtökin ,,Saving Iceland" gengust fyrir mótmælum þar sem stofnbraut sjúkraflutninga var lokað fyrir ekki svo löngu síðan, þá mætti lögreglan á staðinn og leysti þær aðgerðir upp. Sumir sögðu að það hefði verið of harkaleg framganga, aðrir voru sáttir og ég var einn af þeim. Það er nefnilega óþolandi þegar menn ganga of langt í mótmælum sínum og við því á að bregðast.

Ég tel að sama skapi að lögreglan eigi að beita sér fyrir því að fjarlægja þessa vöruflutningabíla af götunum. Aðgerðir sem þessar eiga ekki að skapa almannahættu, það er ólíðandi.

Auk þess eru þetta hjákátlegar aðgerðir. Að sögn eru þeir að mótmæla háu eldsneytisverði. Jú öllum finnst okkur óþolandi að ríkið lækki ekki álögur á eldsneyti, en af þeim skilaboðum sem borist hafa frá þessum söfnuði vörubílstjóra má ráða að þeir eru að fara fram á sérmeðferð. Að þeir verði undanþegnir olíugjaldinu. Af hverju ætti það að vera?

Þá mótmæla þeir því að þeir eru með lögbundinn hvíldartíma. Ég þakka nú fyrir það að búið er að setja einhverjar reglur um það að menn sem keyra um þjóðvegina á þessum risafarartækjum verði að vera sæmilega sofnir.

Og síðan krefjast þeir þess að ríkið sjái þeim fyrir hvíldaraðstöðu. Enn og aftur spyr ég, af hverju? Ég tek nú fram að ég þekki ekki vel hvernig þessum hlutum er háttað í Evrópu, en leggja flutningabílstjórar ekki yfirleitt bara á bílastæðum og eru með svefnaðstöðu í bílnum? Hvað á ríkið að leggja fram hér?

Menn skulu ekki halda það að þetta sé hópur manna sem er að berjast fyrir lækkun eldsneytisverðs til handa almenningi. Þetta er lítill hópur sem er að berjast fyrir þröngum, og að því er virðist illa skilgreindum sérhagsmunum. Þeir eiga enga sérstaka samúð eða stuðning skilinn frá almennum borgurum sem eru þolendurnir í þessum skrípaaðgerðum.


mbl.is Bílstjórar mótmæla
Tilkynna um óviðeigandi tengingu við frétt

Já en...

Vouge er sakað um að ýta undir þá staðalímynd að svartir karlar girnist hvítar konur.

Hvaða karlmaður, hvort sem hann er svartur, hvítur gulur eða grænn, girnist ekki Gisele Bundchen?

Er það þá staðalímynd?

Er ég farinn að blogga eins og ég sé að skrifa Staksteina?


mbl.is Forsíða Vogue sögð ýta undir staðalímyndir
Tilkynna um óviðeigandi tengingu við frétt

Mjög athyglisverð niðurstaða

Þessi frávísun er mjög merkileg. Eftir að hafa rennt yfir niðurstöðukaflann sýnist mér að Istorrent hafi verið með unnið mál í höndunum.

Í niðurstöðunni er í löngu máli farið yfir reglur laga nr. 30/2002 um rafræn viðskipti og aðra rafræna þjónustu. Hraðsoðin yfirferð mín yfir þær reglur sem þar er að finna, með hliðsjón af því sem segir í dómnum, segir mér að það sem gert var á torrent.is sé miðlun gagna og á 12. gr. laganna kemur fram að þjónustuveitandi beri ekki ábyrgð vegna slíkrar miðlunar nema í undantekningartilfellum. Mér sýnist í fljótu bragði ekki að starfsemi Istorrent geti fallið undir þessar undantekningar. Sem sagt unnið mál, eða hvað?

Dómurinn tekur hins vegar ekki endanlega afstöðu heldur vísar málinu frá vegna vanreifunar. Lögmaður Istorrent vísaði nefnilega ekki til laga 30/2002 nema í framhjáhlaupi við munnlegan flutning málsins og gerði ekki neina sérstaka grein fyrir því af hverju sýkna ætti stefnda á grundvelli þeirra laga. Dómstólar eiga ekki að grafa upp lögfræðilegar röksemdir fyrir aðila, heldur ber þeim að koma sínum sjónarmiðum að sjálfir.

Þess vegna sitjum við uppi með það í þessu máli að dómurinn segir nánast berum orðum ,,Við hefðum sýknað ef þú hefðir bara rökstutt mál þitt rétt." En þótt stefndu hafi ekki gert það, þá er ljóst að dómurinn taldi svo nauðsynlegt að taka lög nr. 30/2002 með í reikninginn í málinu að óhjákvæmilegt var að vísa málinu frá þar sem hvorugur aðilinn gerði það. Málið taldist því vanreifað.

Ég segi hér að ofan að mér sýnist í fljótu bragði að Istorrent hafi verið með unnið mál í höndunum. En hafa ber í huga að það er ekki ómögulegt að dómstóll geti seinna komist að þeirri niðurstöðu að einhver af undantekningunum í 12. gr. laga nr. 30/2002 eigi við og að því beri þjónustuveitandinn ábyrgð á miðlun efnis í tilfelli sem þessu. Mér finnst það samt ólíklegri niðurstaða en hitt.


mbl.is Máli gegn Istorrent vísað frá
Tilkynna um óviðeigandi tengingu við frétt

Hafa allir reynt?

Þegar ég sá þessa frétt greip mig löngun til að blogga um efnið og lýsa eigin bernskuminningum. Síðan kom í ljós að það hafa ótrúlega margir fengið þessa sömu hugmynd.

EKki það að leikskólinn á Vopnafirði hafi verið slæmur staður, en það var mjög vinsælt að reyna að sleppa. Það var auðvitað bara leikur eins og hver annar og enginn fór langt. Ég man ekki hvort ég fór einhvern tíma sjálfur, hallast að því að svo hafi ekki verið. En ég man þegar gamla lélega hliðinu sem allir gátu opnað var skipt út fyrir mikinn hlemm með læsingunni að utanverðu og svo himinháu að litlir stubbar gátu ekki náð til hennar.

Annars var ég þó nokkur vogunardjöfsi (daredevil) á leikskóla. Ég og Ingólfur nokkur Magnússon vorum duglegir við að reyna að róla hátt og svona. Ég man eftir að hafa dottið úr dekkjarólu á fullri ferð og einhvern tíma gekk svo mikið á á vegasalti að Ingó stakkst á hausinn fram fyrir sig. En allir komu þeir aftur og enginn þeirra dó.

Leikskólastjóri á þessum tíma var engin önnur en Sigríður Dóra Sverrisdóttir sem kemur reglulega í fréttum vegna öflugs menningarstarfs á Vopnafirði sem fram fer að hennar frumkvæði. Kjarnorkukona mikil og alltaf gaman að hitta hana.

Vá hvað þetta er orðið mikið röfl...


mbl.is Flótti úr leikskóla
Tilkynna um óviðeigandi tengingu við frétt

Frábær saga

Ég hef ekki orðið svo frægur að sjá myndina en bækurnar hef ég gluggað í og þetta er mögnuð og merkileg frásögn. Eitt besta dæmi sem ég hef séð um það hversu myndasögur geta verið áhrifaríkur miðill.

Það er svo sannarlega sorglegt að í einhverjum ríkjum eigi að banna myndina, en kemur svo sem ekki á óvart. Sagan er alls ekki áróður gegn írönskum stjórnvöldum sem slík heldur meira hreinskilin frásögn manneskju sem upplifði byltinguna sem barn og ber saman ástandið fyrir og eftir. Mann grunar að ótrúlega margir Íranir líti hlutina sömu augum og aðalpersónan, en því miður virðist kúgunin hafa náð tökum á samfélaginu og frjálslyndari raddir fá ekki að heyrast. 

Í sögunni kemur líka fram hversu erfitt það er að búa í Evrópu þegar maður kemur frá öðrum menningarheimi og allt er þetta umfram annað saga aðalpersónunnar og hvernig hún tekst á við breytingarnar í umhverfi sínu.

Persepolis er ein af þessum sögum sem allir ættu að kynna sér, hvort sem er í bókar- eða filmuformi. Það væri margt verra hægt að gera en að sýna hana eða gera að lesefni í skólum í tengslum við samfélags- og félagsfræði.


mbl.is Frönsk teiknimynd bönnuð í Líbanon
Tilkynna um óviðeigandi tengingu við frétt

Heima er best

Þá er maður kominn aftur úr snemmbúnu páskafríi fyrir austan. Búið að ferma tvo af ættingjunum og af því tilefni mikið borðað og talað við frændur og frænkur sem maður hittir ekki á hverjum degi.

Það lá fyrir að ég og Heiðdís myndum kíkja eftir íbúð í þessari ferð, og við gerðum gott betur en það. Við gerðum tilboð í íbúð, fengum gagntilboð og samþykktum það. Svo að því gefnu að íbúðalánasjóður klikki ekki þá erum við orðin íbúðareigendur.

Íbúðin er mjög fín, alveg ný og með gestaherbergi. Stefnt er að flutningum í sumar. Að auki þá skrifaði ég undir samning um að vera aðstoðarmaður Birkis Jóns Jónssonar bloggvinar míns. Þannig er ég kominn með einhverja vinnu fyrir austan. Er svo að leita mér að annarri vinnu með þessu. Þið látið mig bara vita ef ykkur dettur eitthvað í hug.

Svona geta stórir hlutir gerst hratt. Það finnst mér skemmtilegt. 


Ef það gætu það nú allir

Berlusconi segir fólki að giftast milljónamæringum, þannig geti það leyst öll sín vandamál. Það er bráðmerkilegt að stjórnmálamenn geti verið svo furðulega þenkjandi að þeim finnist í lagi að láta annað eins út úr sér.

Þetta virðist einkenna hægrimenn. Geir H. Haarde lagði það til við þá sem áttu í erfiðleikum með að eignast húsnæði að þeir slepptu því bara. Ekki kaupa þér húsnæði sagði maðurinn. Spurningin er, hvar eiga menn þá að búa?

Ég ætla hvorugum þeirra að vera svo veruleikafirrtur að þeir hafi meint það sem þeir sögðu. En óvirðingin við raunveruleg vandamál venjulegs fólks skín úr hverju orði. 


mbl.is Gifstu milljónamæringi segir Berlusconi
Tilkynna um óviðeigandi tengingu við frétt

Úff þetta hljómar ekki vel

Ef þessi fyrirsögn væri einhvers staðar annars staðar en á íþróttasíðum þá væri um miklu meira spennandi frétt að ræða.

En hvað veit maður hvað þessir United-menn hugsa og gera...


mbl.is Ferguson spenntur fyrir 17 ára strák
Tilkynna um óviðeigandi tengingu við frétt

Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband