Spunakarlar og kérlingar

Nú er stólað á að hægt sé að hræra upp í Vinstri hreyfingunni grænu framboði. Þau sjá þar sína von um að eyðileggja fyrstu skynsamlegu hugmyndir sem komið hafa frá þessari ríkisstjórn um almenna leiðréttingu skulda.

Hugmyndir VG um félagslegt réttlæti felst nefnilega í því að sá sem hafði miklar tekjur og tók bílalán sem hann réði við greiðslubyrðina af á þeim tíma og keypti sér dýran bíl, hann á ekki skilið hjálp. Sá sem var með lægri tekjur og tók bílalán sem hann réði við greiðslubyrðina af á þeim tíma og keypti sér þar af leiðandi ódýrari bíl, honum skal hjálpað.

VG vill deila út sinni tegund af félagslegu réttlæti, náð og miskunn. Skítt með það að báðar fjölskyldur eru í sömu greiðsluerfiðleikunum. Skítt með neyð og andlega áþján þeirra sem ekki ráða við afborganirnar. Ef þú keyptir dýran bíl þá átt þú ekkert gott skilið!

Að mínu viti þá er þetta eins og að koma að drukknandi manni og byrja á að segja: "Áður en ég kasta til þín bjarghringnum verð ég að fá að vita hvernig þú lentir í sjónum. Varstu fullur? Ertu búinn að haga þér með skynsamlegum hætti? Ertu viss um þú eigir ekki bara skilið að drukkna...?"

Lán dýrra bíla afskrifuð mest

Athugasemdir

[Jóhannes Laxdal Baldvinsson, 15.3.2010 kl. 10:09]

Kannski er hægt að ná einhverjum jöfnuði með því að skattleggja niðurfellingu hins ríka en ekki þess fátæka með tilliti til eignastöðu eftir afskriftir...

[Kristján H Theódórsson, 15.3.2010 kl. 10:28]

Það er auðvitað engin ástæða til að fella niður skuldir umfram þetta sem óvænt hlóðst á lánin við gengishrunið. Menn eiga auðvitað að borga af sínum lánum á sömu forsendum og lagt var upp með við töku þeirra. 

 Það að fara í 110 % af markaðsverði getur skekkt þá mynd, því bílar hrapa býsna hratt í verði og engin ástæða til að menn verði betur settir hvað það snertir, en í venjulegu árferði. Þannig sýnist mér menn væru beinlínis að græða á hruninu.

Ég get hinsvegar aldrei skilið að niðurfelling á skuldaviðbót, tilkominni vegna gengishrunsins, geti talist eðlilegur skattstofn. Þetta skilaði jú "eigendum" sínum engum ávinningi, nema ef þessi 110 % leið verður farin getur það auðvitað komið til í stöku tilfellum!