Hrikalega er ég merkilegur :o)

Mér fannst skemmtilegt að lesa athugasemd frá Sigurjóni Þórðarsyni fyrrverandi þingmanni við þessa frétt á Eyjunni. Hann hefur greinilega tröllatrú á áhrifum mínum hér eystra. Því miður er jafn mikið að marka þetta og flest allt annað sem frá Sigurjóni kemur. Ég get fullvissað áhugasama lesendur um það að ég stend ekki á bak við áskorun á Sigmund Davíð.

Ég hallast hins vegar að því að þeir eðal-, harðkjarna framsóknarmenn hér eystra sem hafa verið að vinna að þessu hafi nú móðgast pínulítið úr því að einhver heldur að þeir séu ófærir um að véla um formannsframbjóðanda án aðkomu strákkjána á Héraði...

Athugasemdir

[Gunnlaugur Stefánsson, 19.12.2008 kl. 23:06]

Ertu ekki aðallega merkilegur fyrir það að hafa unnið Ljótu hálvitanna í spurningakeppni???? 

[FÞB (IP-tala skráð) 20.12.2008 kl. 00:33]

Um þetta má segja eins og vitur maður sagði eitt sinn: "Þar sem lífið er plott, verður lágkúran lögmál."

[Sigurjón Þórðarson, 20.12.2008 kl. 02:10]

Mér finnst gott að þú hafir getað skemmt þér yfir athugasemd minni á Eyjunni. Mér fannst þú líka hrikalega skemmtilegur í spurningakeppninni um daginn. Það er rétt að ég hef tröllatrú á þér og hef frétt, alla leið hingað í Skagafjörðinn, af kynngikrafti Stefáns Boga. Þó hef ég ekki síður trú á þeim sem þú aðstoðar, Birki Jóni sem er góður drengur frá Siglufirði og hvers manns hugljúfi. Þess vegna kemur mér mjög á óvart að Birkir Jón skuli ekki treysta sér í formannsslaginn en eflaust er hann kænn og bíður betri tíma.

Ég er samt ekki alveg viss um að allt sé vitleysa sem ég hef sagt í gegnum tíðina þar sem kvótakerfið, skuldasöfnunin og einkavæðing Framsóknarflokksins hefur komið þjóðinni í koll og mun reynast því ágæta fólki Birki, Höskuldi og Sigmundi fjötur um fót í framaför sinni.

Er ekki kominn tími á þarmahreinsun fyrst Jónína er gengin í flokkinn?