Af hverju ver knattspyrnusambandið ekki dómara sína?

Vælukór Alex Ferguson fer stækkandi og nú syngur Wayne Rooney drengjasópran. Og ekki minnkar söngurinn þó að varnarmaður United hafi komist upp með hreina líkamsárás á Didier Drogba í leiknum. Kunn þeir ekki neitt að skammast sín?

Af hverju er ekki tekið almennilega á svona ummælum? Ef leikmaður sakar dómara um óheiðarleika í leik þá er það rautt spjald. það að saka dómara um óheiðarleika eftir leik á að vera leikbann og ekkert annað.

En það gilda aðrar reglur um Manchester United, gulldrengi enska landsliðsins og skoska ellilífeyrisþega en aðra, það er orðið morgunljóst.

Gungur sem þetta geta verið. Hvernig halda menn að það muni ganga að auka virðingu fyrir störfum dómara þegar menn komast upp með svona lagað.

 

Rooney fékk viðvörun

Hverjir standa sig

Í tilefni af umfjöllun um mikilvægi siðvæðingar í stjórnmálum og að upplýsingar um fjármál liggi fyrir allra augum þá hef ég ákveðið að taka saman upplýsingar um það hverjir af stjórnmálaflokkunum eru að standa sig best hvað þetta varðar, sé litið til skila á gögnum til Ríkisendurskoðunar um kostnað frambjóðenda í prófkjörum og forvali fyrir kosningarnar í vor. Upplýsingarnar eru hér. Staðan er svona:

Sæti  Flokkur                                        Heildarfjöldi    Skil Hlutfall

1.       Framsóknarflokkur                        48                   48   100%

2.       Samfylkingin                                 51                   50    98%

3.       Sjálfstæðisflokkur                          85                   74    87%

4.       Vinstri hreyfingin grænt framboð      103                 84    82%

5.       Frjálslyndi flokkurinn                       6                      1     17%

Ég vil auðvitað byrja á að hrósa mínu fólki og jafnframt gefa þeim sem alltaf reyna að nudda okkur upp úr spillingarskít sem við eigum ekki skilið langt nef.

Næst vil ég benda á slælega frammistöðu íslandsmeistaranna í siðapredikun, Vinstri hreyfingarinnar græns framboðs, í þessum efnum. Ég hef þá skýringu að félagar í þeim floki trúa því virkilega að þau séu bara svo góð og heiðarleg að um þau gildi einhvers konar aðrar reglur. Lög eins og þessi sem sett voru séu fyrir annað og verra fólk en þau sjálf. En lögum þarf að fylgja og skila þeirri, til þess að gera, einföldu yfirlýsingu sem þeir mega fylla út sem eyddu innan við 300.000 krónum í sína baráttu. Allir þeir 19 frambjóðendur flokksins sem eiga eftir að skila uppfylla örugglega það skilyrði, en þeir verða samt að skila yfirlýsingunni!

Eini sitjandi þingmaðurinn sem ekki hefur skilað sínum upplýsingum er Árni Johnsen. Hann þumbaðist líka lengi við að skila upplýsingum um fjárhagslega hagsmuni sína til þingsins. Hann er nú skráður hagsmunalaus þar.

Frjálslyndi flokkurinn er hættur að reyna. Þegar formaður flokksins getur ekki einu sinni skilað frá sér yfirlýsingu til Ríkisendurskoðunar um fjármál í prófkjöri að þá er ástandið aumt.

Leiðrétt 6/11 kl. 3:26 - Í kjölfar hæðnislegrar athugasemdar vestan frá Bandaríkjunum leiðrétti ég villu í tölum VG. Skil þeirra hækkuðu um 2 prósentustig því ég hafði oftalið heildarframbjóðendur um tvo.

Ódýr pólitík forsætisráðherra

Frumvarp um persónukjör er illa ígrundað og er langt frá því að ná þeim markmiðum sem helstu formælendur breytinga á kosningakerfinu leggja áherslu á.

Það er andstaða við málið innan annars stjórnarflokksins. Áberandi andstaða, hugmyndafræðingar eins og Stefán Pálsson og Silja Bára Ómarsdóttir hafa lagst gegn frumvarpinu.

Það er galið að ætla að breyta kosningalögunum nokkrum mánuðum fyrir kosningar. Ég myndi segja að tvö ár væru eðlilegur tími svo umræðan sé ekki í óeðlilegri kreppu.

Samt heldur forsætisráðherra málinu til streitu. Hvað veldur?

Getur verið að hún ætli sér að henda þessu handónýta máli fyrir þingið vitandi að það nýtur ekki stuðnings? Getur verið að hún ætli að berja sér á brjóst og segja: "Sjáið hvað ég er góð, ég vil persónukjör. Sjáið hvað Sjálfstæðismenn og Framsóknarmenn eru vondir valdaklíkuflokkar, þeir vilja ekki persónukjör!"

Andstaðan við þetta frumvarp byggir að mjög litlu leiti á því að menn séu á móti auknu persónukjöri, reyndar held ég að hugmyndir um slíkt njóti nokkuð víðtæks stuðnings. Þetta frumvarp er hins vegar hrákasmíð og allt of seint fram komið.

Það að leggja frumvarpið fram með allt of skömmum fyrirvara og ætla að prufukeyra það á sveitarstjórnum lýsir hroka og lítilsvirðingu gagnvart sveitarstjórnarstiginu í heild sinni.

Það að krefjast þess að allsherjarnefnd hraði afgreiðslu persónulegs metnaðarmáls forsætisráðherra lýsir hroka og lítilsvirðingu gagnvart löggjafarvaldinu.

Það að ætla sér að troða þessu máli í atkvæðagreiðslu án þess að hafa við það stuðning og nota þannig þetta mikilvæga mál til að slá ódýrar pólitískar keilur er lýðskrum og lýsir hroka og lítilsvirðingu gagnvart borgurum þessa lands.

Hættu Jóhanna. Hættu þessu núna.

Persónukjörið að falla á tíma

Mjög þroskað

Þetta er málstað LÍU alveg til feykilegs framdráttar!

LÍÚ lýsir ráðherra með lagi Þursaflokksins

Ekki gleyma genginu

Mér fannst þessar tölur hærri en mig minnti að ég hefði heyrt áður um launatölur í fótboltanum í Skandinavíu.

Þá mundi ég að gengi íslensku krónunnar gagnvart þeirri norsku hefur hrapað. Það útskýrir sumar tölurnar. En það er náttúrulega ágætt fyrir þá sem afla tekna erlendis og eyða þeim hérlendis.

Bara ágætt að hafa í huga að í núverandi árferði eru launatölur sem þessar dálítið afstæðar.

Veigar og Ólafur fengu 4,5 milljónir kr. á mánuði

Áminning

Þessi niðurstaða er þörf áminning til þeirra sem talað hafa fjálglega um hina svokölluðu dómstólaleið í Icesave-málinu. Björninn er ekki unninn þó menn komi málum fyrir dómstóla. Menn þurfa að hafa góðan málstað að verja lagalega og þurfa að vinna málin.

Ég held að Íslendingar uppfylli hvorugt þessara skilyrða.

Kaupþing tapaði máli gegn Bretum

Í ljósi nýfenginna vinsælda

Kæra Jóhanna (eða Hrannar, kemur kannski á sama stað niður...eða hvað? Við byrjum aftur...)

Kæri Jóhrannar

Þar sem ég get nú talið yður á meðal dyggra lesenda þessarar síðu ætla ég að nota tækifærið og koma til skila nokkrum punktum sem ég held að þér hefðuð gott af að heyra. Ég vona að þeir eigi eins greiða leið að hjarta yðar og mitt fyrra blogg.

1. Þjóðin þarf forystu, sýnileiki leiðtoga er nauðsynlegur og við þurfum öll að heyra einhvern stappa stálinu í okkur öðru hverju. Þetta getur enginn utan yðar gert þannig að mark sé að. Af hverju eruð þér ekki að gera þetta? Það að fara undan fjölmiðlum í flæmingi og segja helst ekki aukatekið orð nema tilneyddir er ekki til þess fallið að hvetja þjóðina til dáða í endurreisninni.

2. Við þurfum að kynna og verja okkar málstað erlendis. Af hverju hafið þér ekki beðið utanríkisráðherra (þennan skrýtna með kragaskeggið) um að beita utanríkisþjónustunni af fullum krafti í þetta verkefni. Utanríkisþjónustan hefur verið efld til muna á undanförnum árum til þess að geta brugðist við svona aðstæðum. Það vantar bara pólitísku forystuna. Ef staðan er orðin sú að óbreyttir þingmenn eru duglegri við utanlandsferðir og fundi til að verja þjóðina en ráðherrar og sendiherrar þá er bara eitthvað mikið að.

3. Við þurfum samheldni. Á tyllidögum fyrir kosningar var talað um að þessi fordæmalausa staða kallaði á víðtækari samstöðu stjórnmálamanna en áður hefði þekkst. Þjóðin brást við með því að kjósa til forystu tvo mestu þverhausa sem fyrirfundust í íslenskri pólitík. Þér hafið, kæri forsætisráðherra, ekki verið þekktir að mikilli lipurð í samskiptum við aðra stjórnmálamenn í gegnum tíðina. Samt tókuð þér að yður forystu á tímum þar sem stefnt var að áður óþekktri samstöðu. Afleiðingin er sú að við komumst ekki upp úr skotgröfum deilna og þér hafið varla náð að halda samstarfsflokknum um borð, hvað þá meira. Þér eruð komnir á endastöð.

4. Að mati undirritaðs er aðeins ein leið út úr þessari stöðu. Mynda þarf þjóðstjórn með aðkomu a.m.k. fjögurra stærstu flokkanna á þingi. Til þess að það megi verða þurfa allir flokkar að vera tilbúnir að gera gríðarlegar málamiðlanir og það er ekki pláss fyrir einstrengingshátt. Sennilega yrði það að falla í hlut hins þverhaussins, hæstvirts fjármálaráðherra, að leiða slíka stjórn, enda hefur hann ólíkt forsætisráðherra sýnt viðleitni til að sigla milli skers og báru og leiða þjóðina í höfn þó svo að stýra þurfi eftir öðrum leiðum en hann hefur áður talað fyrir.

Að þessu sögðu kveð ég yður og óska yður ánægjulegra daga á eftirlaunum.

Kveðja

Stefán Bogi (Þú manst ;o) framsóknarbloggarinn)

Óviðeigandi

Það er ágætt að leggja land undir fót og ræða við frændur okkar á Norðurlöndunum. Slíkt er bara gott, hvar í flokki sem menn standa.

Það er gott að leita nýrra leiða og valkosta. Slíkt er til marks um víðsýni og hliðlæga (lateral) hugsun.

Það að lýsa því yfir í fjölmiðlum að við getum vandræðalaust sótt um 2.000 milljarða lán frá Norðmönnum, eftir samtal við einn frekar sérvitran þingmann er pólitískur barnaskapur. Slíkt er ekki fallið til þess að leysa neinn vanda.

Það að bera á borð fyrir almenning slúðursögur og samsæriskenningar um að forsætisráðherra þjóðarinnar sé af annarlegum hvötum að vinna gegn lánveitingu getur í besta falli kallast óviðeigandi.

Slíkt er einkum og sér í lagi til þess fallið að setja niður virðingu þeirra sem þetta gera og að verða félögum þeirra og stuðningsmönnum til minnkunar.

Ummælin fráleitur þvættingur

Þetta er ótrúleg andskotans vitleysa!

Er það ekki dálítið dæmigert að þingmenn ætli að nota sveitarstjórnarstigið til að prufukeyra illa unnið kerfi persónukjörs sem svarar engan veginn kalli þeirra sem í raun og veru vilja auka val kjósenda í kjörklefanum.

Hugmyndin sem frumvarpið byggir á er vitlaus til að byrja með og svo þegar við bætist að það á að henda þessu á með svona stuttum fyrirvara þá er þetta engan veginn boðlegt.

Menn eru þegar farnir að undirbúa sveitarstjórnarkosningar og það er fáránlegt að breyta reglum svo skömmu fyrir þær. Ef Jóhanna er svona áfjáð í að koma á persónukjöri ætti hún að einhenda sér í það núna að breyta lögum um kosningar til Alþingis svo næst megi kjósa með alvöru persónukjöri, ekki kerfi þar sem prófkjörsátök eru færð alveg aftur að kjördegi.

Með því að segja þetta forgangsmál opinberar Jóhanna bæði mjög skakka sýn á mikilvægustu verkefni samtímans og sýnir á sama tíma sveitarstjórnarstiginu einstaka óvirðingu.

Persónukjör forgangsmál á þingi

Nei hættið nú þessu væli

Êg var pirraður þegar ég horfði á leikinn. Fannst dómarinn (dómarínan?) dæma ójafnt og vítin smásmuguleg. Ég er líka Íslendingur og spenustigið hátt. Ég hélt sem sagt með öðru liðinu og því átti ég errfitt með að vera hlutlaus þegar kom að því að meta frammistöðu dómarans á meðan á leiknum stóð.

Ég jafnaði mig nú mjög þegar hún dæmdi líka víti á Frakkana og þegar ég var búinn að kæla mig niður þá er niðurstaðan sú að dómarinn var ekki lélegur. Það getur verið að sú lína sem hún lagði hafi hentað Frökkunum betur og hún hefði mátt taka harðar á bakhrindingum úti á velli, en dómarinn var ekki lélegur.

Þessu er fyrst og fremst beint til fjölmiðla. Ofuráhersla á dómarann kemur bara niður á vitrænni umræðu um leikinn og frammistöðu íslenska liðsins, sem var ekki alveg nógu góð. Við skulum ekki kenna dómaranum um það og ekki heldur velta okkur upp úr mistökunum heldur vonast eftir bættum leik á móti Norðmönnum (Norðkonum?) Hættið að væla!

EM: Þær bestu eru ekki hér