Leita í fréttum mbl.is

Bloggfærslur mánaðarins, mars 2008

Ha?

Gaf Björn Bjarnason lögreglunni á Vestfjörðum prívat og persónulega 13 tetrastöðvar? Er það ekki eitthvað skrýtið? Er það ekki til marks um fullkomna uppgjöf í málaflokknum, ef menn geta ekki tryggt lögreglumönnum nauðsynlegan búnað en fara í eigin vasa rjóðir af skömm yfir framgöngu ríkisstjórnarinnar og fjármálaráðuneytisins?

Eða getur hugsast að enn séu menn að ruglast og persónugera eitthvað sem kemur úr sameiginlegum sjóðum okkar. Það er nú ágætt að Björn hugsar fallega til lögreglunnar á Vestfjörðum, en fyrr má nú vera sleikjuskapurinn ef honum eru persónulega færðar þakkir fyrir að útdeila af náð og miskunn gæðum, eða öllu heldur nauðsynlegum búnaði, sem er greitt fyrir af fjárlögum.

Ég vil fá nánari skýringar á þessu.


mbl.is Ráðherra færði lögreglunni á Vestfjörðum tetrastöðvar
Tilkynna um óviðeigandi tengingu við frétt

Og hvar verður hann staðsettur?

Eitthvað segir mér að það muni verða í Reykjavík. Umræða Samfylkingarinnar um störf án staðsetningar og fjölgun opinberra starfa úti á landi með þeim hætti var ekkert annað en ómerkilegur fagurgali. Þvert á móti er nú verið að taka starf sem ætti vel heima annað hvort á Höfn í Hornafirði eða á Egilsstöðum og staðsetja það í Reykjavík, undir formerkjum starfs án staðsetningar!

Umhverfisráðherra er þegar búinn að flytja eitt starf hjá Veiðistjóraembættinu frá Akureyri til Reykjavíkur, og nú bætist þetta við. Það, auk grímulauss áróðurs ráðherrans gegn olíuhreinsunarstöð á Vestfjörðum, gerir það að verkum að ekki er hægt að ímynda sér annað en að ráðherranum sé ekki bara sama um landsbyggðina eins og meginþorra Samfylkingarmanna, heldur sé hún beinlínis fjandsamleg landsbyggðinni.  


mbl.is Ráðinn framkvæmdastjóri Vatnajökulsþjóðgarðs
Tilkynna um óviðeigandi tengingu við frétt

Þriggja manna maki

Hvað getur maður sagt. Einn hættir og þrír skipaðir í staðinn. Ingibjörg Sólrún hefur sagt skilið við þá stefnu sem Valgerður Sverrisdóttir markaði, þ.e. að skipa ekki nýja sendiherra. Eftir skammarlega framgöngu Davíðs Oddssonar í utanríkisráðuneytinu, þar sem hver vildarvinurinn eftir annan voru skipaðir sendiherrar, þá lá fyrir og liggur enn fyrir að of margir sendiherrar eru í utanríkisþjónustunni.

Nú hefur Ingibjörg Sólrún fjölgað þeim um tvo og skipar að auki aflóga stjórnmálamann í embætti. Eitthvað segir mér að það hefði heyrst hljóð úr horni ef Valgerður Sverrisdóttir hefði gert þetta sama. Valgerður er hins vegar með bein í nefinu og tók ekki þátt í þessari vitleysu.

Eitthvað segir mér að það verði heldur ekki vandamál að skipa nýja sendiherra í stað þessara fimm til sjö sem eru víst að hætta á næsta ári. Og eitthvað segir mér að við munum sjá að kratarnir hafi engu gleymt þegar kemur að því að skipa sína menn í sendiherrastöður, rétt eins og þær stöður sem þeir hafa þegar fyllt af sínu fólki á þessu ári sem þeir hafa verið í ríkisstjórn.


mbl.is Sigríður Anna skipuð sendiherra
Tilkynna um óviðeigandi tengingu við frétt

Flottir strákar

Verst að ég náði aldrei að sjá þá á sviði. Miðað við það sem ég heyrði frá þeim var þetta hins vegar ótrúlega flott hljómsveit. Það er hins ekki það sem mér finnst merkilegast við þá. Miðað við viðtalið sem ég las við þá þegar þeir tilkynntu ákvörðunina að hætta virðast þessir strákar vera með hausinn alveg rétt skrúfaðan á.

Þeim fannst þetta bara ekki alveg vera að ganga og vildu fá að vera strákar í friði. Kannski klára menntaskóla og svona. Þeim fannst hlutirnir vera farnir að þróast í einhverja átt sem þeir voru ekki sáttir við og ákváðu bara að slá botninn í þetta. Minni menn hefðu kannski látið undan pressunni og voninni um að ,,meika´ða", eins ofnotaður og sá frasi er nú annars, og haldið áfram að spila fyrir einhvern annan en sjálfa sig. Það hefði ábyggilega endað með ósköpum. En þeir eru flottir tónlistarmenn og geta tekið upp þráðinn aftur.

Þá er komið að því að finna sér nýja unghljómsveit til að halda upp á. Eðli málsins samkvæmt fylgist maður þá með Músíktilraunum. Og að sjálfsögðu held ég staðfastlega með hljómsveitinni Spítala Alfreð. Ég meina, er annað hægt!? Ég hef reyndar aldrei heyrt þá spila, en nafnið tryggir gæðin...


mbl.is Jakobínarína hætti með látum
Tilkynna um óviðeigandi tengingu við frétt

Ekki hlutverk dómara

Eins og stundum áður þá næ ég að vera bæði fullkomlega sammála Jóni Steinari og fullkomlega ósammála honum í sömu andrá.

Það að almenningur þekkir ekki dómara og að þeir fela sig nánast fyrir fjölmiðlum er ekki til þess fallið að skapa traust á dómstólunum. Það er hins vegar alveg fráleitt að hugsa sér það að dómarar þurfi að sitja undir yfirheyrslum og pressu um að útskýra niðurstöður sínar aftur og aftur í fjölmiðlum. Réttarkerfi okkar, eins og annarra þjóða byggir á því að niðurstaða í dómsmáli sé endanleg. Það gengur engan veginn að mál séu flutt í fjölmiðlum, ekki áður en þau eru flutt í dómi og alls ekki eftir á. Fyrir svo utan að dómarar gefa alltaf út ítarlegan rökstuðning fyrir niðurstöðum sínum. Sá rökstuðningur heitir dómur og er birtur opinberlega. Ég hvet fólk til þess að lesa dóma áður en það fer að kvarta yfir því að þeir séu óskiljanlegir. Oftast eru forsendur dómara mjög skýrar þar.

Dómarar eru auk þess ekkert einir um það að geta tjáð sig um dóma eftir að þeir falla. En hin fáranlega vanhæfa fjölmiðlastétt þessa lands gerir aldrei neitt í því að leita til fagmanna um útskýringu á dómum. Blaðamenn tjá sig undantekningalítið af yfirgripsmikilli vanþekkingu um dómsniðurstöður og með það eitt að markmiði að skapa sem mesta úlfúð, en ekki að leiða hið sanna í ljós.

En þó dómarar ættu ekki að tjá sig um dóma sína eftir á, þá mættu þeir hins vegar vera mun virkari í lögfræðilegri umræðu á Íslandi. Það er alveg skelfilegt, hjá þjóð sem hefur stundað það umfram aðrar þjóðir að setja virtustu fræðimenn á sviði lögfræði í stóla hæstaréttardómara, að þessir sömu fræðimenn hætta alveg að skrifa og tjá sig um lögfræði. Ég vil sjá að hæstaréttardómarar gefi frá sér fræðirit um lögfræði, tali á málþingum og séu virkir í fræðilegri umræðu. Raunar hugnast mér vel að veita þeim hreinlega reglulega rannsóknaleyfi til að sinna þessum þætti.


mbl.is Dómarar tjái sig opinberlega
Tilkynna um óviðeigandi tengingu við frétt

Æi nei

Miðað við það sem ég hef kynnt mér, þá held ég að þau tvö yrðu hreint ekki gott framboðspar. Clinton gerir út á það að vera reynsluboltinn, kann öll trixin og er engin jómfrú þegar kemur að pólitískum leðjuslag. Obama vill hefja sig upp fyrir hið hefðbundna pólitíska argaþras og koma inn með ferska vinda. Að mínu mati myndi það eyðileggja ímynd hans að vinna með Clinton-klíkunni. Ég held að Bandaríkin þurfi á forseta að halda sem reynir að sameina þjóðina og heitir hvorki Clinton né Bush.

Auk þess held ég að það sé engin alvara í þessu hjá Hillary. Hún er að reyna að sannfæra óákveðna sem hrífast þó af Obama um að þeir geti fengið bæði með því að kjósa hana og hún muni bjóða Obama varaforsetann. Ég held hins vegar að hún hafi engan áhuga á að hafa varaforsetaefni sem gæti skyggt á hana. Evan Bayh verður varaforsetaefni Clinton ef hún vinnur, ég er nokkuð sannfærður um það. Mér líst hins vegar betur á að Obama vinni þetta og taki hershöfðingjann Wesley Clark með sér. Það yrði sterkt par.


mbl.is Útilokar ekki framboð með Obama
Tilkynna um óviðeigandi tengingu við frétt

Ekkifréttir

Eru það fréttir að það sé ódýrara að búa í Danmörku en á Íslandi. Hefur þetta ekki verið svona í áratugi? Það er líka miklu ódýrara að búa víða í Evrópu en í Danmörku, hvers vegna flykkist fólk ekki til þeirra landa. Ég skil sannast sagna ekki þetta mjálm.

Það verður sennilega alltaf dýrara að búa hér á landi en annars staðar, fjarlægðirnar og fámennið munu sjá til þess. Það hafa engir vondir stjórnmálamenn komið þessu svona fyrir. Ef fólk vill búa erlendis þá má það gera það. Ef fólk vill flytja heim þá er það gott mál, en það er dýrara. Alveg eins og húsnæði er dýrara á höfuðborgarsvæðinu heldur en úti á landi. Þannig eru aðstæðurnar bara og menn velja og hafna í þessu sem öðru. Ég er ekki að segja að það eigi ekki að reyna að lækka vöruverð hér á landi eða að efla nýsköpun í atvinnumálum en hlutirnir verða aldrei eins hér og þeir eru í Danmörku, nú eða Noregi, Svíþjóð, Bandaríkjunum eða Bretlandi.

Og ég nenni ekki að hlusta á eitthvað kjaftæði um að hér á landi sé einhæft atvinnulíf. Eðlilega er auðveldara að finna störf við hæfi í stærri samfélögum en atvinnulífið á Íslandi stendur í blóma í mörgum mismunandi atvinnugreinum. Það að einhverjum finnist of dýrt að búa á Íslandi og langi ekki að vinna hér, heldur finnist betra að búa og starfa í útlöndum eru ekki fréttir. 


mbl.is Ekkert vit í að flytja til Íslands
Tilkynna um óviðeigandi tengingu við frétt

Einkaher?

Það er þekkt í sögunni að valdamiklir menn hafa viljað koma sér upp sérstökum lífverði með einhverja sérstaka eiginleika. Einhvers staðar las ég að einn að síðustu landstjórum Túnis, með titilinn Bey, hafi komið sér upp einkaher dverga. Mig minnir líka að einhver af Prússakeisurunum hafi komið sér upp lífverði manna sem allir voru yfir tveir metrar á hæð. Úr heimi kvikmyndanna þekkjum við svo líka tilhneigingu svokallaðra ofurillmenna til að koma sér upp einkalífverði fagurra en morðóðra kvenna.

Ég veit ekki hvað það segir um Björn Bjarnason, en mér sýnist hann vera að vinna í því að koma sér upp einkaher miðaldra, nauðasköllóttra og illilegra karlmanna með gleraugu. Mætti ég þá frekar biðja um fagrar konur, nú eða dverga.

Karl Steinar Valsson yfirmaður fíkniefnadeildar LRHÞórir Hrafnsson aðstoðarmaður ráðherraGeorg Lárusson forstjóri Landhelgisgæslunnar

 

 

 

 

 

 


mbl.is Ráðinn aðstoðarmaður Björns Bjarnasonar
Tilkynna um óviðeigandi tengingu við frétt

« Fyrri síða

Innskráning

Ath. Vinsamlegast kveikið á Javascript til að hefja innskráningu.

Hafðu samband